The Netherlands Ram ah Chinmi ( By Pu Tawk Cung)
Biahmaithi:
Netherlands ram cu Europe khuamual chung um ram fate pakhat asi. A ram bitkauh hi Chinland nak uak deuh fang asi. Milu dihlak hi 17,8 million hrawng kan si. Hi chung ahhin anmah kokek Netherlands hi 15 million hrawng an si i a dang hi ram dangmi kan si.
Hi cabia nih hin nile thla, kum le caan, hruaitu, minung min le thilsining a neknawi tuk tiang in
langhter aa tim lo. Netherlands um Chinmi kan tuanbia tlangpi huap in langhter duh mi asi.
1. Netherlands ah Chinmi
Netherlands ram hi ramdang in refugee a cohlang i a bawmchan kho ngai vemi ram asi. Ram
kip in ralzaam dirhmun in a phanmi mi tampi a cohlan hna i tha tein a zohkhenh hna. An caah
rampi budget tampi a hman tawn.
Cuti ram dang ralzam a cohlanmi hna lak ahcun Kawlram ralzaam zong tamlak te a rak lak ve
hna. A tambik cu Thailand ramri ah a ummi Karen ralzam an si i 2000 kum helham ah khan
UNHCR program in a rak lak hna.
Kawlram cu uknak thalo le tihnung tang khuasa kan rak si caah 2007-2008 hrawng ah khan Chin, Burma, Kachin le Rakhine pawl zong cikpak tete in kan rak lut ve hna. Hi a hnu ah a lut mi pawl hi cu UNHCR program in silo in mah program cio in kan luh hnu ah asilum(dornak) kan hal khi asi.
Chinmi chung in Netherland a phan hmasa bik hi Pu Peter Thang Mang(Mindat) asi i Malaysia in July, 2001 ah a phan. A dang pawl chung in a tam deuh hi cu 2007- 2008 - 2009 chung a phan mi kan si dih ngawt. 2009 tiang i Chinmi milu dihlak hi 56 kan si.
Atu ah Netherlands a ummi Chinmi dihlak cu:
1.Inn dihlak...........42 (Family 24, Single 18)
2.Milu dihlak.........115(pa..66, nu;39, Upa..83, Hngachia: 32)
3.Netherlands phak hnu nau chuak thar:19
4.Kan mah chung in thihloh tonmi: 3
5.Kaltakmi chungkhar sinin thihloh tongmi: 22 6.NL phak hnu aa thi-um mi: 14
Bu background(Denominations):(Baptist, Methodist, Sabath, RC, Full Gospel,CJC(Believers),The Church,UPC, MEC..) Miphun teng: Lai(Hakha, Thantlang, Zophei), Falam, Tlaisun, Hualngo, Mindat, Tedtim, Mara,Lautu, Senthang, Matu, Zotung,..
A. Kan luh ning le kan luhka
Kan luh ning hi a dang cio. Kan lam zong aa dang cio. Puaisa tawlrel pinak in asi. Bangkok, Singapore, Hongkong tiin lam dangdang cio in kan lut ko.
Airport kan luh in asilum kan hal colh. Cun Camp ah an kan chiah i imigration lei nih biahalnak an kan tuah. Kan konglam le kan zaamnak a ruang an kan hal. Kan sining an dothlat dih hnu ah anram chung dornak nawl pekding le pek lo ding bia an khiah.Kan ram buai tuk lio asi caah fawi tein an kan cohlan colh ko.
Umnak nawl an kan pek hnu zong ah cun open camp(zalong tein um khawhnak) ah an kan chiah. A process hi kum khat tal hi cu a rau ko. Cu hnu lawng ah kan case a thiang i chungkhar auhnak le a dangdang zong i teltum khawh asi.
Chinmi pawl hi kanram ah a rak i theihngal cia kan si hna lo. Cikpak tete in kan luh tik le kan luh
ni le thla ai khah lo tik ah hmun dangdang cio ah kan um hna. Fawi le bai in kan i peh thlai kho
hna lo. Kan Chin hawi an phan ti tu hi cu kan i thei pah ko. Camp ah caan zeimawzat kan um hnu khin cun kan Chin hawi he pehtlaihnak tha tein kan ngei kho. Kan hna a ngam deuh ngaingai.
B. Camp kan umlio har kan timi:
Chungkhar kan ngai. Kan lung a leng. Ei le din kan i ziak lo. Lai rawl te kan hlam peng.
Hmunhma thar siseh, khuati le caan siseh kan i ziak lo. An kan hnon lai i Kawlram ah an kan
khirh suallai tiah tihphannak nganpi kan ngei.
An holh le ca kan thiam lo tik ah mi hrut kan lo. An hmanmi thilti pawl kan hmanthiam lomi tampi
a um. Kan cawn chom. Kan I chuahsual caan tete zong a um pah. Pumh le khawmh kan ngai tuk(an kan tuaktan piakmi pumhnak cu a um ko nain holhdang le miphun kip cawh a si tik ah kan i ziak bak lo).
Umkal man(Bus, Train citman) a fah caah kan lungduh in kan i tlawng in kan i pal kho hna
lo(zalong tein an ram chung ah umkal khawh cu a si ko). Zarhkhar ah € 52( thlakhat ah 208)
hrawng lawng an rak kan pek.
2. Camp in kan chuah hnu
Kan case thiang hirhiar in kan awn hnu ah kum nga umnak status an kan pek. Chungkhar
auhnak an kan tawlrel piak colh. Khua chung ah inn hlan in umnak nawl kan ngei cang. Inn kan
hmuh cun khua chung ah kan i thial cio hna. Kanmah tein inn hmuh zong cu a har caah anmah
mibawmtu bawmhnak in a si bik.
Kanmah duhnak khua ah silo in inn kan hmuh khawhnak khua ah kan um cio. Cucaah Netherlands ram chung khua kip le hmunkip ah kan i thekdarh dih. Camp kan chuah hnu hin cun cozah nih phung an ngeih bantuk in an holh le ca, nunphung le thil sining tete(inburgering anti) cawnnak kha kan hun ngei cio. Cu cawnmi certificate ngeih lo cun rammi sinak sawk khawh asi lo.
3. Chin Family
Hiti inn cio kan hun um hin NLChin Family tiin biaruahnak mail group kan ngei i kan i pehtlaihning a tha deuh ngai. Christmas ni hna hmunkhat ah kan hmang kho. Thal caan ah picnic hna kan tuah kho i sport day tiin hmunkhat nuamhnak hna kan ngei kho.
Kan nih Chinmi cu Khirfa cia kan si dih caah kanmah kan umnak khua cio i Khrihfabu pakhakhat sin ah pumhnak cu kan va ngei cio tawn. A sinain mah holh le ca a si lo tik ah kan lung di a riam kho hrim lo.
Zarhpini ah biakinn kan va phan ve timi te lawng khi a si. An hla kan sa kho ve lo, a
thawngtha chimmi kan thei kho ve lo i thazaang laak ding kan ngei tuk lem lo. Thla kan va cam
le thawhlawm kan va thawh ve mi lawng bak khi a si. Mikip nih saduh kan thah bikmi cu mah
holh le ca, bia le hla te he pumhnak ngeih khawh le Pathian thangthat khawh hi asi.
2010-2011 khan nupi-fate ngei cia pawl nih kan chungkhar kan vun auh cio hna i kan milu kan
hung karh deuh. Kan fanu fapa hna an hmailei kong zong cu ruah loawk a tha ti lo. Chiat-that va
ton sual caan va i zohkhenhnak caah siseh, Chinmi kan sinak(bia,holh, ca, nunphung)
venhimnak caah siseh, Pathian zumtu kan sinak (khrifa) a nun khawh peng nak ding caah siseh
kau deuh ngai in khua kan hun ruat cio.
4. Chin Community Netherlands (CCNL)
Hi hlan cu NLChinfamily ti mi mail group biaruahnak in a herhmi thawng kan thanh(Mail group
moderator lawng kan ngei). Chiat/that kan tonmi thawng kan i thanh i pumpak in i lenkai le thla i
campiak in caan kan hmang.
Hi tiang lawng cu kan di a riam lo. A fel deuh, a kau deuh le a tha deuh mi hruaining kan herh kan ti caah Chin Community Netherlands (CCNL) ti in kan hun thlen. Kan cawlcangh ning a hung kau deuh ngai. Chin National Day (CND) zong kan tuah kho leng mang(Kawlram in tlangcung miphun hawi nih an kan sunhsak pi ngai).
Chiat/that kan ton caan i kan i zohkhenh ning le kan i bawmhchanh ning zong a hung tha deuh ngai ngai. (Fianhnak ah: Kawlram, Lairam, asiloah ram dangdang ah a ummi chungkhat rualchan chung in thihloh kan ton tik ah program ngei in i topinak, bulh i pekna kan ngei kho).
Hi vialte nak in kan biapit ter deuh mi le kan duh deuh bik mi cu hmunkhat te i pumhnak ngeih
khawh hi asi. Kan khua aa dan cio tik ah le umkal man a fah tuk tik ah kan caah thil harsa ngai a
si. Sinain kan duhnak lung nih a tei caah hmunkhat pumhnak ngei ding in bia kan khiah.
5. Chin Christian Fellowship Netherland (CCFNL)
Hmunkhat te i pumh le Pathian thangthat kan duh caah CCNL(Chin Community NL) tang ah CCFNL timi kan hun tuah i hmunkhat pumhnak cu May 8, 2011 in kan thok. The Passie, Uthrecht ah kan i pum.
Rampum huap in aa thihruaimi kan si tik le kan umnak khua ai dan cio tik ah, cun umkal man a fah fawn tik ah kan duh ning in thil a si kho lo. Cu caah thla khat ah voikhat ( first week of the month) ah hmunkhat pumhkhawmhnak kan hun thok.
Hi pumhnak hi Pathian va thangthat lawng silo in hmuh sung tonhar ngai le caan sunglawi ah kan ruah caah kan i nuam in kan i lawm kho taktak. Pumh thok hlan le dih hnu ah thawngpang kan i hal, bia lungduh zakip kan i ruah hna i kan i nuam kho hringhran.
Hi kan i thithruainak ahhin phunghram felfai te(phundang te) kan ngei. Ram dangdang a ummi Chinmi dang hna he kan i dannak thil tampi a um. Kan nih cu mi tlawmte kan si pin ah Chinram chung miphun tengnge(mio nwe suh, holh,ca ai dangmi), kan tlin pin ah bu dang cio (denominations) kan tling.
Kan uarmi, kan dirhmun, kan backgroung, ai dang cio. Chinmi kan i funtomnak ah hin kan zatlang holh cu kawl holh a si ko. Cubantuk minung daw le rem, lungrual le theithiam te um ti cu a fawi lo ngaingai. Sinain miphun(Chin) ah pakhat, zumhnak(Khrih) ah pumkhat kan si timi lungput he nuam tele daw tein kan um ko.Chin Christian Fellowship nih hin pumhkhawmhnak, Pathian thangthatnak lei paoh hi tuanvo a
lak i Chin Commuity NL nih hin zei dang lei cawlcanghnak paoh hi tuanvo a lak ve.
6. Kan Cawlcangh ning
Thla khat ah voikhat(first week of the month) kan i pum. Christmas le kum thar, cun Chin
National Day hi hmun khat ah kan hmang ti. Kum khat ah(thal caan, kan fale sianginn kharpi) ah
khin kum fatin picnic(nikhat), sport day(nikhat) le weekend Campaign(ni thum) kan ngei tawn.
Cun Kachin, Karen Khrihfabu hna he nubu, mino program in i hawikomhnak (bawlung chuih)kan
ngei tawn.
Ram chung(kawlram chung) in siseh, Ramleng in siseh bomhnak hal mi tete an um tik ah kan si
khawh tawk in kan bawmh ve tawn hna. A hlei in ram chung ah hartongmi;( mautam, Hakha
khua mincimh, Falam khua mincimh, Paletwah ralzaam, cun inn kang meithet ton) caan ah kan
si khawh tawk tein kan i tel ve tawn.
Mission(ramthar) rian tuannak ah hin kan thazang a der pah. Kan bu backround aa dan tik ah kan khuaruah ning zong aa khat thlu kho lo. Sinain tlawmpal te cu kan tuan ve ko. MIT ah Master of Divinity a kaimi Saya Bu Ling( Mindat pa) hi a dih tiang kan rak zoh ve. Cun Paletwa field ah khaute pakhat ah Biakinn kan sak piak hna. Kawlram chung zum lotu hna sin i thawngtha chimnak(crusade tuahnak) zong ah kan rak i tel nak a um pah ve.
6. Chin Christian Church the NetherLand
Community hruainak tang in i pumhkhawmh lawng khan kan sia a rem deuh ti lo. Khrihfabu(Church) i thithruai ning te in um kan duh caah 2016 in Chin Christian Church of Netherlands (CCCNL) ti min in Khrifabu in kan dir. Chin Community NL tu kha a um ti lo. Hiti Khrihfabu in kan hun dir hin cozah zung ah registration kan i tuah i cozah theipi mi bu kan hung
si.
Kan um caan zong cu a hun sau ve cang tik ah cozah bawmhnak lawng to ti loin mahte riantuan kan hung tam. Kan khuasak zong a hun i nin deuh cang caah le boruak zong kan hun hlai khawh deuh ve cang tik ah, cun Khrihfabu(Church) bak in kan hun dir cang tik ah thlakhat voikhat lawng pumh cu kan sia a rem ti lo i voi hnih in kan hun i pum.
2020 cun thlakhat ah voi thum in kan hun i pum cang na in Covid-19 ruang ah April, 2020 khan sau lak te biakinn kan phan kho ti lo(zoom cun kan I pum kho peng). Covid-19 a thian hnu cun thlakhat voi thum in
Biakinn pumnak kan ngei kho cang i a dang zarh cu zoom in kan i pum.
Pumhnak inn hi voikhat pumh ah Euro 250 in kan hlan i thlakhat ah Euro 750 kan dih. Pumh a
dih hnu ah khin hmunkhat ah chuncaw rawl kan i hrawm peng. A caan ah cun koffee le changreu lawng a si i a caan ah cun rawl ngaingai kan ei tawn. Zawtfah tik, thihloh thawng chia theih tik le thatnak(nupi thit/va ngeih, nau thar ngeih) ton tik ah bulh, bawmh, tlawm kan i pe
tawn.
Hmailei ahcun kanmah nih Pumhnak hmunhma(biakinn theng asi lo hmanh ah Chin Centre)
ngei kho sih tihi kan saduhthah asi. Cun ramthar rian(mission) ah thazaaang chuah khawh deuh
ding le kan fale pawl sinah hin zumhnak(khamhtu Khrih Jesus an cohlan khawh ding) le kan
miphun sinak an philhthlau lonak ding hi kan thlacamnak bik asi.
Mibu pakhat kan sive tik ah Khrihfabu thithruaining lawng in i tawlrel dih awk a rak tha lo. A hlei
in Ram kong, Miphun kong( abik in tu lio dohthlennak kong), le vawlei lei herhhai kong vialte ah
tawlreltu bu ngeih kan herh. Cucaah 2022 in Chin Community NL tiin a voihnihnak kan hun dirh
than.
7. Netherlands ah Sianghngakchia
Netherlands ram ah hin Bible/secular sianginn thatha a um. Cu ah cun Kawlram in a hung kaimi
tete an um peng. Kanmah Chinmi chung zong hin kum fatin ngawt in dongcat lo in a kai mi an
um peng ve. Cu hna nih cun an kan thathnem ngaingai. Bia lei, hla lei le thawngtha lei ah an
kan dirkamh ngaingai. Secular lei in sianginn a hung kaimi pa hnihkhat zong an um. 2008 in
2022 tiang ah hin Bible sianghngakchia 15, le Secular 2 an an si.
8. Midang pawl:
Netherlands ah hin Karen hi minung 1300 leng an um. A tambik an si. Buddist zong an um i
Khrihfa zong an um. Khrifa pawl hi an umnak hmun hoih in hmun thum ah pumhnak(Khrihfabu)
an ngei. An nih cu tuan deuh pi ah a phan mi an si caah second genaration an si ti khawh a si.
An fanau le pawl (hi ka hmun chuak le thang pawl) cu Biakinn an panh tuk ti lo.
Kawl le Rakhine hi cu Buddist an si dih ngawt. Kachin hi an milu 70 hrawng ansi. An i funtom
kho ngai. Pumhnak le bu felfai an ngei kho.
Donghnak
Netherlands um Chinmi hi kan i daw. Kan i theithiam. Kan i cohlang. Kan umnak le kan sining
nih a pek lo caah hin kan lungduh ning in dawtnak kan langh ter kho cio lo.
I thithruainak tu ahcun kan sining arak i dan tuk ve tik ah harnak tete cu a um pah. Duhsah tein
hmai ah kan kal ko. ( By Pu Tawk Cung)
Post a Comment